Түркістан облысы Төлеби ауданындағы Ақмешіт ауылының туристік аймағында жауын-шашын салдарынан Ақмешіт өзенінің деңгейі көтеріліп, бірнеше өткел мен көпірді су шайып кетті, соның нәтижесінде тұрғындар қауіпсіз жерге көшірілді ,-деп хабарлайды «Dalamedia» ақпараттық порталы.

Төтенше жағдай Төлеби ауданындағы демалыс аймағында тіркелген. Қатты жауыннан кейін өзен тасып, демалыс аумағы мен пикник алаңын жалғайтын екі уақытша көпірді ағызып әкеткен. Сондай-ақ Екпінді ауылындағы өткел де зақымданған.

Оқиға орнына төтенше жағдайлар қызметі жедел жетіп, Екпінді ауылынан 11 адамды, оның ішінде 7 баланы қауіпсіз аймаққа шығарды. Демалыс орнынан 70 адам эвакуацияланды, олардың қатарында 20 бала бар.

Ресми мәліметке сәйкес, ешкім медициналық көмекке мұқтаж болмаған, зардап шеккендер тіркелмеген.

Қазіргі уақытта уақытша өткелді қалпына келтіру үшін арнайы техника жұмылдырылған. Оқиға орнында төтенше жағдайлар қызметі, «Қазселқорғау», полиция және жергілікті атқарушы органдардың мамандары жұмысын жалғастырып жатыр.