Елдің бірқатар өңірінде су тасып, жолды шайып кетті — деп хабарлайды «Dalamedia» ақпараттық порталы.

Төтенше жағдайлар министрлігінің мәліметінше, Ақмола облысы Зеренді ауданында Шағалалы өзенінің суы көпірден асып кеткен. Айта кетерлігі, көпір 28 үйлі көшені ауылдың негізгі бөлігімен жалғайды. Құтқарушылар қайықпен 16 адамды тасымалдап, халықтың үйлеріне қатынауына және азық-түлік жеткізуіне көмектескен.

Қазір су деңгейі біртіндеп төмендеп келеді. Оқиға орнында әкімдік, төтенше жағдай қызметі мен полиция өкілдері кезекшілік етуде.

Сондай-ақ Солтүстік Қазақстанның Ақжар ауданында еріген қар суы «Ленинградское – Айсаринское» бағытындағы аудандық маңызы бар жолдың бір бөлігін шайып кеткен. Жергілікті әкімдік мамандарының сөзінше, бұл қауіптің алдын алу мақсатында арнайы жасалған. Қазір жолды қалыпқа келтіру жұмыстары жүргізілуде.