Абай облысында №10 қазақ гимназиясының оныншы сынып оқушысы Аружан Кабдулмаратовa тұрмыстық пластик қалдықтарды пайдаланып жол жабындысының инновациялық технологиясын ойлап тапты, — деп хабарлайды «Dalamedia» ақпараттық порталы.

Аружанның жобасы жолдардың қызмет ету мерзімін ұзартуға және жөндеу шығындарын азайтуға мүмкіндік береді. Ол 7-сыныптан бері экологиялық бағыттағы жұмыстармен айналысып, пластик қалдықтарды қайта өңдеу әдісін жасап, оны асфальтқа қосқан.

Мамандардың айтуынша, бұл технологиямен жасалған жолдар орташа есеппен 12-18 жылға қызмет етеді. Сапалы құрылыс жағдайында жолдың өмір сүру ұзақтығы 20-25 жылға жетуі мүмкін. Сонымен қатар, экоасфальт дәстүрлі материалдарға қарағанда экономикалық тиімді болып саналады.

Жоба жол сапасын бақылауды автоматтандыруды қарастырады. Екінші кезеңде Аружан автономды роботтар жүйесін енгізуді жоспарлап отыр: бір робот жолдағы ақауларды анықтайды, ал екіншісі оларды жылдам түзетеді. Бұл жөндеу уақытын қысқартып, шығындарды азайтады.

Абай облысы әкімдігінің мәліметінше, жобаның басты мақсаты – пластик қалдықтарын тиімді пайдаланып, қоршаған ортаны қорғау және жол құрылысы саласына жаңа шешімдер енгізу. «Экоасфальт» жобасы арқылы жас өнертапқыш туған өлкесінің экологиясын сақтауға нақты үлес қосып отыр.