Әзірбайжанда робот-мұғалім сабақ берді. Жоба Баку қаласындағы лицейлердің бірінде сынақтан өтуде, – деп хабарлайды «Dalamedia» ақпараттық порталы «МИР 24» сайтына сілтеме жасап.

Киберпедагог оқушыларды даусынан және түр-әлпетінен тани алады. «Бильгя-бот» сынып ішінде дөңгелекпен еркін қозғалып, балалардың сұрағына жауап бере алады. Тәжірибелік сабақ барысында ол оқушылармен қайықтың моделін жасаған. Физика, инженерия, математика және өнер пәндерін ұштастырып, ерекше форматта оқытқан.

Оқушы Юсиф Ибрагимлидің айтуынша, робот тапсырмаларды қарапайым тілмен түсіндіреді. «Түсінбей қалған тұстарымды сұрасам, анық әрі жеңіл жеткізеді», – дейді ол.

Сондай-ақ ол цифрлық форматтағы кітапхана қызметін де атқара алады. Робот оқытушы баға қоймайды. Бірақ оқушының жауап беру мәнерінен, қимыл-қозғалысынан оның сабақты түсіну деңгейін аңғара алады.

Төртінші сыныпта оқитын Зия Мұхтарлы ешқандай робот адамды алмастыра алмайды дейді:

«Робот қызық әрі пайдалы болғанымен, нағыз мұғалімді алмастыра алмайды», – дейді оқушы.

Сондай-ақ Зарифа Халилова деген ұстаз да осы ойды қолдайды. Оның сөзінше, роботтың міндеті – тек балаларды қызықтыру. «Ал мұғалім басымдыққа ие болуы керек», – дейді ол.

Бұл Әзербайжан Білім министрлігінің пилоттық бастамасы. Егер лицейдегі сынақ оң нәтиже көрсетсе, басқа да мектептерге енгізілуі мүмкін.