Алматылық колледждердің бірінде оқытушы студенттің төбесіне нысана қойып, оқ атқан. Бұл оқиға видеоға таспаланып, әлеуметтік желіде қызу талқыға түсті. Кадрларда білімгердің нысананы басына қойып тұрғаны және педагогтың мылтықпен оқ атпақ болғаны түсіп қалған.
Видео авторларының айтуынша, студент ұстазының айтқанын істеуге мәжбүр болыпты:
«Сабақ барысында оқытушы студенттерді мылтықтың нысанасында тұруға мәжбүрлеген. Мұндай әрекеттер оқу үдерісіндегі қауіпсіздік талаптары мен педагогикалық этиканы өрескел бұзу болып есептеледі», – дейді видео авторлары.
Алматы сәулет, дизайн және инженерия колледжінде орын алған оқиға алғашқы әскери дайындық сабағы барысында болған. Мекеме өкілдері де ресми мәлімдеме жасады.
«Алматы сәулет, дизайн және инженерия колледжінде сабаққа қатысы жоқ оқиға орын алды. Оқытушының топпен бейресми қарым-қатынасы барысында штаттық оқ-дәрілер қолданбай, жұмсақ затты пайдалану арқылы пневматикалық мылтықтан оқ атқан. Ешкімге зияны тиген жоқ. Аталған әрекеттер оқыту әдісі де, жазалау түрі де емес. Колледж әкімшілігі педагогикалық этика мен қауіпсіздік техникасы талаптарының бұзылғанын мойындайды», – делінген хабарламада.
DALAMEDIA admin
Бүгін, 17:00
Қоғам