«Қазақ елі» алаңында ұйымдастырылған жарық шоуы түнгі аспанды түрлі бейнелермен көмкеріп, көпшілікке мерекелік көңіл күй сыйлады. Жиналған жұрт ұлттық нақыштағы көріністерді тамашалады.

Аспан төрінде киіз үй, тайқазан, шұбат құйылған тостаған, түйелі керуен және асық бейнелері бірінен соң бірі көрініс тапты. Бұл образдар көшпелі мәдениетті, береке-бірлікті және ұлттық болмысты айшықтай түсті.

Сондай-ақ, көктемнің келуі мен табиғаттың жаңаруын білдіретін үш өлшемді қызғалдақ бейнесі де көрермен назарын аударды. Күн мен айдың бейнесі күн мен түннің теңелгенін аңғартты.

Кеш соңында аспанда «Наурыз құтты болсын!» деген жазу пайда болып, мерекелік шараның шарықтау шегіне айналды.