Қостанай ауданына қарасты Мичуринское кентінің «Восточный» шағынауданын небәрі жарты сағат ішінде еріген қар суы басып қалды, — деп хабарлайды «Dalamedia» ақпараттық порталы.

Тұрғындардың айтуынша, 29 наурыз күні кешке су күрт көбейіп, көшелер мен аулаларды тез арада су басып кеткен. Су астында қалған аумақтарды олар видеоға түсіріп, әлеуметтік желілерге жариялаған. Бұл туралы «Алау» ақпараттық порталы жазды.

Қостанай ауданының әкімі Олжас Нұрғалиев жағдайға байланысты жедел шаралар қабылданғанын мәлімдеді. Оның сөзінше, қардың тез әрі көп еруіне байланысты Мичурин ауылдық округіндегі көшелер мен жолдарды қазу туралы шешім қабылданған. Бұл жұмыстар тұрғын үйлер мен мүлікті қорғау үшін жүргізіліп жатыр.

Әкім тұрғындарды сабырға шақырып, дүрбелеңге жол бермеуді өтінді. Қазір оқиға орнында арнайы техника мен төтенше жағдай қызметінің мамандары жұмыс істеуде.

Аталған жағдайға байланысты әкімдік жанынан жедел штаб құрылған. Ресми мәліметке сәйкес, тұрғын үйлерді су баспаған, мүлікке зиян келмеген. Сондай-ақ түнгі уақытта еріген қар суы Қостанай қаласындағы Құнай шағынауданына дейін жеткені белгілі болды.