Тараз қаласындағы орта мектептердің бірінде үзіліс кезінде болған төбелес салдарынан 10-сынып оқушысы ауыр жарақат алып, көзінен айырылды,-деп хабарлайды «Dalamedia» ақпараттық порталы.

Оқиға мектептің киім ауыстыратын бөлмесінде болған. Алдын ала мәлімет бойынша, 15 жастағы Дамирді 9-сынып оқушылары шақырып алып келген. Бейнебақылау камерасындағы кадрларда әңгіме тез арада жанжалға ұласып, артынша төбелеске айналғаны көрінеді.

Зардап шеккен оқушының досы оған араша түсуге тырысқанымен, оны ұстап қалған. Осы сәтте Дамирдің басынан соққы тиген. Соған қарамастан ол киім ауыстыратын бөлмеден өз күшімен шығып үлгерген.

Жарақат алған балаға дереу ота жасалды. Дәрігерлердің айтуынша, көзін қалпына келтіруге барынша әрекет жасалғанымен, жағдайы ауыр күйде қалып отыр. Анасының сөзінше, алдағы күндер аса маңызды, себебі инфекцияның миға таралу қаупі бар.

Оқиғаға байланысты полиция қылмыстық іс қозғады. «Ауыр дене жарақатын келтіру» бабы бойынша сотқа дейінгі тергеу басталған. Күдікті ұсталып, уақытша ұстау изоляторына қамалды.