20 қаңтар күні Шымкент қаласындағы Ерімбетов пен Рысқұлов көшелерінің қиылысында жол-көлік оқиғасы орын алып, соңы жаппай төбелеске ұласқан. Оқиға салдарынан 40 жастағы ер адам қаза тапты.

Алдын ала мәліметке сәйкес, екі автокөліктің жүргізушілері арасында жанжал туындаған. Сол сәтте олардың қасына тағы бір көлік тоқтап, ішінен шыққан адамдар да жанжалға араласқан. Нәтижесінде төбелес басталып, бірнеше адам зардап шеккен.

Оқиға кезінде жарақат алған екі адам ауруханаға жеткізілген. Алайда олардың біреуі алған жарақаттарының салдарынан көз жұмды.

Аталған дерек бойынша полиция қылмыстық іс қозғады. Қазіргі уақытта күдіктілерді анықтау және ұстау мақсатында жедел-іздестіру шаралары жүргізіліп жатыр.

Шымкент қалалық Полиция департаментінің хабарлауынша, күдіктілерді ұстау үшін департаменттің барлық күштері мен құралдары жұмылдырылған.