Ресейдің Грозный қаласында 21 жасқа дейінгі жасөспірімдер арасында еркін күрестен Солтүстік Кавказ федералдық округінің чемпионаты өтті. Алайда жарыстың соңғы күні спорттық бәсеке жаппай төбелеске ұласты.

«ЧП Владикавказ» Telegram-арнасының мәліметінше, қақтығысқа шамамен 30 адам қатысқан. Жанжал Солтүстік Осетия - Алания өкілі Давид Ваниев пен шешен балуаны Турпал Алхоев арасындағы белдесуден кейін басталған.

Кездесу қорытындысы бойынша төрешілер жеңісті Давид Ваниевке берген. Бұл шешімге наразы болған тараптар арасында сөз таласы туындап, жағдай тез арада ушығып кеткен.

Кейін жанжалға тек спортшылар ғана емес, жарысқа қатысушылар мен көрермендер де араласып, төбелес бақылаудан шыққан. Оқиғаның салдары мен ұйымдастырушылардың ұстанымы әзірге нақтыланған жоқ.