Дубайда өтіп жатқан бокстан IBA нұсқасы бойынша әлем чемпионатында қазақстандық боксшылар жартылай финалға дейін жетіп, алты медальға ие болды. Регламентке сәйкес, үшінші орын үшін жекпе-жек өткізілмейтіндіктен, ширек финалда жеңіске жеткен әр спортшы кемінде қола жүлдені қамтамасыз етті.

Қазақстан құрамасы он салмақ дәрежесінде ширек финалға шыққан еді. Солардың алтауы келесі кезеңге өтіп, ел қоржынына медаль сыйлады. 48 келіге дейінгі салмақта Теміртас Жүсіпов непалдық Лал Прасад Упретиді 5:0 есебімен жеңсе, дәл сол нәтижемен Абылайхан Жүсіпов әзербайжандық Сархан Алиевті тоқтатты. Ал, 63,5 келіде Ертуған Зейнуллинов Израиль өкілі Ахмад Штивиді айқын басымдықпен ұтты.

Сондай-ақ 57 келідегі Оразбек Асылқұлов испаниялық Карлос Мартинес Бернадпен өткен жекпе-жекте де толық үстемдік көрсетті.
Сонымен қатар, 2021 жылғы әлем чемпионы Сәкен Бибосынов (54 кг) замбиялық Мвенго Мвалені жеңіп, тағы бір медальға жол ашты.
Ал 75 келіге дейінгі салмақта Сабыржан Аққалықов қарсыласын алғашқы раундта-ақ нокаутқа түсіріп, жартылай финалға шықты.

Қазақстан намысын қорғаған 13 боксшының жетеуі медальға қол жеткізе алмады. Ширек финалдан әрі аса алмағандар қатарында Ерасыл Жақпеков (81 кг), Нұрмағамед Юсупов (92 кг), Дәулет Төлемісов (86 кг), Серік Теміржанов (60 кг), Санатәлі Төлтаев (67 кг), Нұрлан Сапарбәй (+92 кг) және Даниял Сабит (51 кг) бар.

IBA әлем чемпионаты 13 желтоқсанда аяқталады. Бүгін Дубай рингінде жартылай финалдық жекпе-жектер өтеді.