Жетісу облысында көрші әйелге ауыр дене жарақатын салу дерегі тіркелді,-деп хабарлайды «Dalamedia» ақпараттық порталы.

Оқиға 3 наурыз күні Сүйіксай ауылында болған. Мәліметке сәйкес, ер адам көрші әйелдің кішкентай балаларына тіл тигізген. Бұған наразы болған әйел оған ескерту жасаған сәтте жанжал туындап, ер адам қолындағы қар күрейтін күрекпен әйелге бірнеше рет соққы жасаған. Оқиғаға сол маңда жүрген мектеп жаттықтырушылары араласып, жанжалдың одан әрі ушығуына жол бермеген.

Жарақат алған әйел бірден ауруханаға жеткізілген. Дәрігерлер оған бас-ми жарақаты, ми шайқалуы, бастың ашық жарақаты және сол қолының сынуы диагнозын қойған. Қазіргі таңда ол хирургиялық бөлімде ем қабылдап жатыр.

Ал күдікті азамат ұсталып, уақытша қамауға алынды. Қазір аталған дерек бойынша тергеу амалдары жүргізілуде.