Атырауда 39 жастағы әйел итті байлап қойып, күрекпен тоқтаусыз ұрған, – деп хабарлайды «Dalamedia» ақпараттық порталы.

Оқиғаға қатысты видео әлеуметтік желіде тарап, жұрттың наразылығын тудырды. Осыдан кейін әйел бірден полицияның назарына ілігіп, тергеу басталды.

Белгілі болғандай, тұрғын өз мысығын талап тастаған итті осылай жазаламақ болған. Алайда қатты соққы салдарынан жануардың тұмсығы қан-жоса болып, ауыр жарақат алған.

Полиция мәліметінше, әйел оқиға орнына келген қызметкерлердің заңды талабына да бағынбай, қарсылық көрсеткен. Осы әрекеті үшін оған әкімшілік айыппұл салынды. Ал жануарға қатыгездік танытқаны үшін қылмыстық жауапкершілік қарастырылып отыр.

Зардап шеккен итке ветеринариялық көмек көрсетілген. Қазір оқиғаның барлық мән-жайы анықталып жатыр.

Құқық қорғау органдары жануарларға қатыгездік көрсету тұрмыстық жанжал емес, заң алдында жауапкершілікке әкелетін құқықбұзушылық екенін ескертті.