16 бүлдіршінге қатыгездік көрсеткен балабақша тәрбиешісі жауапқа тартылмақ. Оқиға Павлодар облысында болған, – деп хабарлайды «Dalamedia» ақпараттық порталы Pavlodarnews.kz-ке сілтеме жасап.

33 жастағы тәрбиешінің ісі кәмелетке толмағандар істері жөніндегі мамандандырылған ауданаралық сотта қаралуда. Мәліметтерге сүйенсек, ол кіші топтағы жеткіншектерге күш қолданған.

Айыптаушылардың айтуынша, тәрбиеші итеріп, құлағы мен шашынан тартып, басынан және денесінен ұрған. Тіпті орындықтан құлатқан көрінеді. Балаларды ұйықтайтын уақытта киіндіріп-шешіндіру барысында да күш қолданған.

Прокурор Кристина Тунгусованың айтуынша, мұндай әрекеттер бір ай бойы қайталанған. Мәселен, 2 маусым күні сағат 15:52-де балалардың бірі орындықтан құлаған. Басқа күндері де соққы жасау, итеру және дөрекі қарым-қатынас фактілері тіркелген. Кей эпизодтар бірнеше сағатқа созылған. Жәбірленушілер – жасы бір жарым мен екі жас аралығындағы 16 бала.

Қылмыстық іс Қылмыстық кодекстің 140-бабының 2-бөлігі бойынша қаралуда. Бұл бап кәмелетке толмағандарды тәрбиелеу міндетін тиісті деңгейде орындамауға қатысты жауапкершілікті көздейді. Алғашқы сот отырысында айыпталушы әйел өз кінәсін толық мойындады.