Алматы облысы Талғар қаласында 7 баланың әкесі қаза тапты, - деп хабарлайды «Dalamedia» ақпараттық порталы. Оқиға кезінде үйде төрт кәмелетке толмаған бала болған.

Қайғылы оқиға 14 ақпанда жалдамалы пәтерде болған, ер адам бірнеше пышақ жарақатынан қаза тапқан. Оқиғаға полиция көрші әйелдің айқай-шуды естігеннен кейін жеткен. Пәтерде екі ересек әйел болған: марқұмның бұрынғы әйелі – төрт баланың анасы және қайын енесі. Бұрынғы әйелі оқиғадан кейін балконға жасырынса, қайын енесі мәйіттің жанында болған.

Оқиғаның ер адамның рұқсатынсыз жылқыларын сатумен байланысты болуы мүмкін. Әйелі бір жылқы мен екі құлынды иесінің рұқсатынсыз сатып жіберген. Ер адам 11 ақпанда полицияға арыз жазған, бұл дерек бойынша қылмыстық іс қозғалған.

Марқұм 1978 жылы 15 қазанда туған. Артында 7 баласы қалды: бірінші некесінен 3 ересек, екінші некесінен 4 кәмелетке толмаған бала. Адвокат балалардың психологиялық жағдайына алаңдаушылық білдіріп, оларға шұғыл психологиялық көмек қажет екенін атап өтті. Қазіргі уақытта балалар анасының туыстарының қолында. Қылмыстық істі тергеу жалғасуда, ал күдіктілер уақытша ұстау изоляторына қамалған.