Екі жасар қызды көлік қағып кетіп, мерт болды. Оқиға Қостанай облысы Рудный қаласында болған, – деп хабарлайды «Dalamedia» ақпараттық порталы.

Жергілікті полиция департаментінің дерегінше, сөз «Газель» маркалы автокөлігі туралы болып отыр. Жүргізуші көлікті кері бағытта жүргізу кезінде баланы байқамай қағып кеткен.

Аталған факті бойынша сотқа дейінгі тергеп-тексеру басталды. Тергеу аясында оқиғаның нақты мән-жайы, жүргізушінің әрекеті мен қауіпсіздік талаптарының сақталуы жан-жақты зерделеніп жатыр.

Полиция өкілдері жүргізушілерді барынша сақ болуға шақырады. Аталған іс бойынша шешім тергеу нәтижесіне байланысты болмақ.