Астанада түнгі қалың қардың салдарынан жол қозғалысы күрделене түсті. Қалалық полицияның мәліметінше, таңертеңнен бері 93 жол-көлік оқиғасы болған. Құқық қорғау органдары жүргізушілерді ауа райының қолайсыздығына байланысты аса сақ болуға шақырады. Қар, көру мүмкіндігінің шектелуі және көктайғақ қозғалысты айтарлықтай қиындатып отыр.

Полиция жүргізушілерге келесі талаптарды қатаң сақтауды ескертеді:

• жылдамдықты барынша төмендету;

• көліктер арасындағы қашықтықты ұлғайту;

• кенет манёвр жасамау және күрт тежемеу;

• жаяу жүргіншілер өткелдері мен қиылыстарға жақындағанда жылдамдықты алдын ала азайту.

Сонымен қатар автокөлік техникалық тұрғыда дұрыс күйде болуы тиіс. Қыс мезгілінде тек қысқы шиналарды қолдану міндеттеледі, бұл талапты бұзу жауапкершілікке әкеледі.

Қалалық полиция жол жағдайын бақылауды жалғастырып жатыр. Жүргізушілерге ауа райын ескере отырып, бағыттарын алдын ала жоспарлап, жолда барынша мұқият болу ұсынылады.