2026 жылғы 1 шілдеден бастап Қазақстанда электрсамокаттарды пайдалану ережелері қатаңдайды, - деп хабарлайды «Dalamedia» ақпараттық порталы. Енді жалға берілетін самокаттарға міндетті сақтандыру мен тіркеу нөмірі енгізіледі, ал тротуар мен жаяу жүргіншілер жолымен жүруге тыйым салынады.

Жаңа ережелерге сәйкес, самокаттарды жалға алушылар тек 18 жастан асқан және жүргізуші куәлігі бар адамдар болуы тиіс. Кикшеринг компаниялары құралдардың техникалық жағдайын қадағалап, жылдамдықты бақылау жүйелерін орнатып, самокаттарды қауіп төндіретін жерлерде қалдырмауға міндетті.

Алматыда инфрақұрылымды кеңейту жоспары жүріп жатыр: қосымша 80-88 шақырым веложол салынады, арнайы «ортақ қозғалыс аймақтарында» жылдамдық сағатына 6 шақырымға шектеледі. Полиция бұл шаралардың жолдағы тәртіпті күшейтіп, апат санын азайтуға бағытталғанын хабарлады.