2025 жылы Алматыда электросамокаттардың қатысуымен 386 жол-көлік оқиғасы тіркеліп, салдарынан 400-ден астам адам түрлі жарақат алған. Бұл туралы қалалық полиция департаменті мәлімдеді.
Құқық қорғау органдары келтірген деректерге сүйенсек, жол ережелерін бұзған электросамокат пайдаланушыларына қатысты 24 мыңнан аса әкімшілік хаттама толтырылған. Сонымен қатар 10 мыңнан астам самокат арнайы айып тұрағына қойылған.
Осы мәселеге байланысты Алматыда полиция департаменті, прокуратура, қала әкімдігі және кикшеринг қызметін көрсететін компания өкілдерінің қатысуымен жұмыс кеңесі өтті. Жиында электросамокаттарды жалға беретін операторларға қойылатын талаптар талқыланды. Атап айтқанда, міндетті сақтандыру енгізу, көліктерді нөмірлік белгілермен жабдықтау, геозоналау жүйесін іске қосу және сервистерді Ішкі істер министрлігінің дерекқорларымен біріктіру мәселелері көтерілді.
Қалалық полиция департаментінің бастығы Айдын Қабдулдиновтің айтуынша, мопедтерге қатысты қабылданған қатаң әрі жүйелі шаралар өз нәтижесін берген.
— Мұндай талаптар жол-көлік оқиғаларының азаюына және тәртіптің күшеюіне әсер етті. Дәл осындай тәсіл электросамокаттарға да қолданылады. Бұл — азаматтардың өмірі мен денсаулығын қорғауға бағытталған шешім, — деді ол.
Сондай-ақ кеңес барысында заңнамаға енгізілетін өзгерістер де сөз болды. Жаңа нормаларға сәйкес, электросамокаттар ресми түрде көлік құралы ретінде танылады. 2026 жылдың 1 шілдесінен бастап күшіне енетін талаптар арендалық электросамокаттарды пайдалану тәртібін біріздендіреді. Бұл ретте бизнес өкілдеріне өтпелі кезең қарастырылған.
DALAMEDIA admin
9
0