Шымкентте жекеменшік мектептің мұғалімі 1-сынып оқушысына азғындық жасаған деген күдікпен ұсталды, – деп хабарлайды «Dalamedia» ақпараттық порталы. 25 ақпан күні сабақ кезінде оқушыға денесіне қол жұмсау фактісі тіркелген.

Қыздың анасының айтуынша, қызы үйге келгенде денесінде ауырсыну сезініп, күйзеліске ұшыраған. Ол мұғалімнің оны күштеп алдына отырғызып, өтініштерін елемей жағымсыз әрекеттер жасағанын айтқан. Мектеп әкімшілігі бейнебақылау жазбаларын бастапқыда көрсетпеген.

Кадрлардан мұғалімнің қарсылық көрсеткен қызды күштеп алдына отырғызғаны анықталған. Мектеп директорының орынбасары мұның арам ойсыз болғанын айтқанымен, оқиға құқық қорғау органдарының назарына алынған.

36 жастағы мұғалім төрт жылдан бері мектепте қызмет етіп келген, екі баланың әкесі. Қазір ол уақытша жұмыстан шеттетіліп, қылмыстық іс қозғалды. Полиция барлық куәліктерді жинап, бейнежазбаларды зерттеуде. Қорлық көрген қыз мектепке жуырда ғана ауысқан.