Алматыда 2026 жылы жер сілкінісін алдын ала ескерту жүйесін енгізу үшін 583 миллион теңге жұмсалмақ, – деп хабарлайды «Dalamedia» ақпараттық порталы stan.kz сайтына сілтеме жасап.

Бұл деректер мемлекеттік сатып алу порталында жарияланған. Хабарландыруда қызмет сипаттамасы «Cell Broadcast технологиясы негізінде төтенше жағдайлар кезінде жаппай мобильді ескерту жүйесін енгізу» деп көрсетілген.

Жүйе үздіксіз жұмыс істейді деп жоспарлануда. Яғни аптасына 7 күн, тәулігіне 24 сағат, кез келген уақытта хабар жіберу мүмкін болады. Алайда қызмет қолжетімсіз болған уақытта жарамсыздық мерзімі 80 минуттан аспауы тиіс. Жер асты дүмпулерінің күші бес балдан асса, хабарлама тарату жүйесі автоматты түрде іске қосылады. Хабарламалар «Президенттік» немесе «Ұлттық ескерту» деп аталып, мәтіні Алматы тұрғындарының соңғы жер сілкіністері кезінде алған ескертулерімен толық сәйкес келеді.

Жүйеге қол жеткізу құқығы Төтенше жағдайлар департаменті мен қала әкімдігіне берілген. Айта кетейік, 2025 жылы осындай жобаны іске асыруға 474,8 миллион теңге бөлінген болатын. Жуырда Алматы облысында 3 балдық жер сілкінісі тіркелген еді.