Жетісу және Алматы облыстарының бірқатар аумағында жер сілкінісі тіркелді. Сейсмикалық ошақ Қазақстан аумағында, Алматы қаласынан солтүстік-шығысқа қарай 284 шақырым қашықтықта орналасқан.

Мамандардың мәліметінше, жер сілкінісінің есептік қарқындылығы Жетісу облысының бірнеше елді мекенінде 3 баллға дейін жеткен. Атап айтқанда, Панфилов ауданының Жаркент қаласында, Текелі қаласында, Ақсу ауданының Жансүгіров ауылында және Сарқан қаласында 3 баллдық жер дүмпуі сезілген.

Сонымен қатар, Жетісу облысының Ескелді ауданына қарасты Қарабұлақ кентінде, Талдықорған қаласында, Көксу ауданының Балпық би ауылында, Қаратал ауданының Үштөбе қаласында, Кербұлақ ауданының Сарыөзек ауылында жер сілкінісінің күші 2 балл деңгейінде болған.

Алматы облысында жер сілкінісі Ұйғыр ауданының Шұнжа және Қырғызсай ауылдарында, сондай-ақ Еңбекшіқазақ ауданының Көкпек пен Шелек ауылдарында 2 балл шамасында сезілген.

Қазіргі таңда қираған ғимараттар мен зардап шеккендер туралы ақпарат тіркелген жоқ. Тиісті қызметтер жағдайды бақылауда ұстап отыр.