3 қарашаға қараған түні Ауғанстанның солтүстігінде жойқын жер сілкінісі болды. Магнитудасы 6,3 балдық дүмпу Мазари-Шариф қаласынан шығыс-оңтүстік-шығыс бағытта шамамен 45 шақырым жерде, Балх провинциясының аумағында тіркелген.

Алдын ала мәлімет бойынша, табиғи апат салдарынан кемінде 20 адам көз жұмып, 75-тен астам адам жараланды. Бұған дейін жеті адамның қаза тауып, 150 адамның жараланғаны хабарланған еді. Билік өкілдері қаза тапқандардың саны көбеюі мүмкін екенін, себебі іздестіру-құтқару жұмыстары жалғасып жатқанын мәлімдеді.

Көршілес Саманган провинциясында да жер сілкінісінен екі адам қаза тауып, шамамен 200 адам жараланған. Балх пен Саманган арасындағы негізгі жол опырылған тастар мен үйінділерден жабылып, көмек жеткізуге қиындық келтіруде.

Бұқаралық ақпарат құралдарының хабарлауынша, жер сілкінісі кезінде Мазари-Шариф қаласындағы әлемге әйгілі Көгілдір мешітке де зақым келген. Бұл мешіт қала символы әрі кей деректер бойынша, төртінші әділ халифа - Әли ибн Әбу Талибтің (р.а.) жерленген орны саналады.

Қазіргі уақытта Ауғанстан билігі мен халықаралық ұйымдар апат аймағындағы зардап шеккендерге көмек көрсету жұмыстарын жалғастырып жатыр.