Алматылық оқушылардың төбелескен сәті таспаланған видео әлеуметтік желіде кеңінен тарады, – деп хабарлайды «Dalamedia» ақпараттық порталы.

Әлеуметтік желіде жарияланған видеода оқушылардың өзара жанжалдасып, төбелескен сәті түсіп қалған. Оқиғаға байланысты ата-аналар оқу орнына наразылық білдірді. Олар оқушылар арасында дау-дамайдың жиілеп кеткеніне алаңдаулы.

Бір оқушының анасының айтуынша, қыркүйек айында оның балаларына бір топ жасөспірім шабуыл жасаған. Бірақ мұны мектеп әкімшілігі естісе де, нәтиже жоқ. Сондай-ақ ол жанжалдың басталуына себеп болған 7-сынып оқушысы басқа балаларға әлі де қысым көрсетіп жүргенін алға тартты.

Мектептегі төбелестердің әдейі видеоға түсіріліп, TikTok желісіне жүктелуі ата-аналарды алаңдатты. Олар буллингке жол берген оқушыларды жауапқа тартып, оқу орнында ішкі тексеріс жүргізуді талап етті. Сонымен қатар қалалық білім басқармасы мен құзырлы органдардан мәселені бақылауға алуды сұраған.

Полиция оқиға бойынша тексеру жұмыстарын бастады. Қақтығысқа қатысқан барлық жасөспірім анықталды. Олардың ата-аналары балаларды тәрбиелеу міндетін тиісінше орындамағаны үшін әкімшілік жауапкершілікке тартылды.

Кәмелетке толмағандар мектепішілік профилактикалық есепке алынып, материалдар аудан әкімдігі жанындағы тиісті комиссияның қарауына жолданды. Полиция өкілдері жасөспірімдермен түсіндіру және алдын алу жұмыстары жүргізілгенін, тексеру қорытындысы бойынша заң аясында қосымша шаралар қабылданатынын мәлімдеді.