Әйгілі Burger King желісінің Қазақстандағы филиалында дау шықты. Оқиға аутизмі бар қызметкердің жағдайына қатысты орын алып, әлеуметтік желіде қызу талқыға түсті, — деп хабарлайды «Dalamedia» ақпараттық порталы.

Әлеуметтік кәсіпкер Жанат Қаратай желідегі өз жазбасында ұлы Әлібектің төрт жыл бойы тұрақты еңбек етіп, сыйақысын алып, қосымша сағаттарда жұмыс істегенін, сондай-ақ алдағы уақытқа демалысын жоспарлап жүргенін жазды. Алайда жаңа аймақтық басшы келгеннен кейін жағдай өзгерген. Анасының айтуынша, ұлын жұмыстан кетуге мәжбүрлеу әрекеттері байқалған, ал жеке әңгіме нәтиже бермеген:

— «Сөйлескенде роботпен сөйлескендей болдық. Ол жақында біздің елге келген және инклюзивті қоғам принциптерімен таныс емес сияқты», — деп жазды әйел.

Еңбек және халықты әлеуметтік қорғау министрлігінің мәлімдеуінше, бір басшы уақытша қызметінен босатылған. Алматы қаласындағы еңбек инспекторы қызметкердің тұрғылықты жеріне барып, еңбек құқығын қорғау жолдары мен заңмен берілген кепілдіктерді түсіндірген.

— Жұмыс берушіден алынған ақпарат бойынша («QSR (Burger King)» ЖШС), ұйым ішінде қызметтік тексеру жүргізіліп жатыр. Сол тексеру кезінде бір басшы уақытша қызметтен шеттетілді, — деп хабарлады министрлік өкілдері.

Burger King Kazakhstan өкілдері бастапқыда жағдай үшін өкініш білдірген. Кейін компания ресми мәлімдеме жасап, қызметкердің жұмыстан босатылмағанын мәлімдеді. Компания мамандарының айтуынша, 29 қаңтарда қызметкер HR-ға демалыс рәсімдеу ниетін білдіріп, кейін жұмысқа шықпай қалған. Ал 6 ақпанда қызметкердің анасы оның атынан жұмыстан шығу өтінішін берген. Burger King жағдайды реттеу үшін басқа мейрамханаға ауыстыру мүмкіндігін ұсынып, ішкі тексеріс жүргізген.

Департамент өкілдері тексерудің нақты мерзімін жарияламады. Қосымша ақпарат кейінірек берілетінін айтты. Бұл оқиға әлеуметтік желілерде кеңінен талқыланып, пайдаланушылар басшылықты ауыстыруды, жағдайды бас кеңседе қарастыруды талап етті.