Атырау облысында оқушы қатысқан төтенше жағдайдан соң Құлсары қаласындағы А. С. Пушкин атындағы №6 мектептің директоры қызметінен босатылды. Бұл туралы оқиғаға байланысты жүргізілген қызметтік тексеру аяқталғаннан кейін белгілі болды.

Өңірлік білім басқармасының мәліметінше, 5 ақпанда аталған білім беру мекемесінің басшысына қатаң сөгіс жарияланған. Ал келесі күні директор өз еркімен қызметтен кету туралы өтініш жазып, ол бірден құпталған.

Басқарма өкілдері кадрлық шешім қабылдауға мектеп ғимаратында болған жағдай негіз болғанын атап өтті. Атап айтқанда, 10-сыныпта оқитын 15 жастағы оқушы қатарластарымен жанжалдасып, кейін оларға шабуыл жасап, оқу орнының аумағынан өз бетімен кетіп қалған.