Қыздарға ерлер әжетханасын тазалатпақ болған Түркістан облысындағы көпсалалы индустриалды-техникалық колледж жатақханасында орын алған жағдай әлеуметтік желіде қызу талқыға түсті, – деп хабарлайды «Dalamedia» ақпараттық порталы.

Тазалықты талап еткен жатақхана қызметкері комиссия келетінін ескерткен. Алайда қыздар өз бөлмелерін ғана тазалауға ниетті екендерін жеткізген. Бірақ бұған қанағаттанбаған маман студенттердің ата-аналарына шағым жасайтынын айтыпты.

Мұндай тапсырманы әділетсіз деген білімгерлер қарсылық білдірген. Дегенмен мекеме қызметкерлері оларды «тәртіпке бағынбады» деп, жатақханадан шығару мәселесін де көтерген.

Аталмыш оқиғаға қатысты Түркістан облысының білім басқармасы ресми түсініктеме берді. Ведомство мәліметінше, жағдай бақылауға алынып, арнайы комиссия құрылып, тексеру жұмыстары жүргізілген. Нәтижесінде колледжде 1072 студент білім алатыны, оның 80-і жатақханамен қамтылғаны анықталған. Сондай-ақ 23–25 ақпан күндері өтетін облыстық спартакиадаға байланысты жатақханаға қатысушыларды орналастыру қажет болған. Осыған орай қызметкерлер студенттерден бос тұрған бөлмелерді тазалауға көмектесуді ауызша сұраған.

«Жатақханада студент жігіттердің уақытша болмауына байланысты қыздардан бос бөлмелердегі тазалыққа көмектесу өтінілген. Кейбір студенттердің келіспеуінен түсініспеушілік туындады», – деп хабарлады басқарма.

Қазіргі уақытта студенттер мен олардың ата-аналарына түсіндіру жұмыстары жүргізілуде. Жауапты басқарма білім алушылардың құқықтары мен қауіпсіздігі басты назарда екенін атап өтті. Ішкі тәртіп талаптарын күшейту және мұндай жағдайлардың алдын алу үшін қосымша шаралар қабылданып, жауапты тұлғаларға қатысты заң аясында шешім шығарылмақ.