Алматы облысының Қарасай ауданында қабаған иттер 52 жастағы әйелге шабуыл жасап, ол түрлі жарақатпен ауруханаға жеткізілді, – деп хабарлайды «Dalamedia» ақпараттық порталы.

Оқиға 17 ақпанда Қарасай ауданына қарасты Ұмтыл ауылдық округінде болған. Бір үйдің ауласында жүрген бірнеше ит әйелге тап берген. Зардап шегушіге медициналық көмек көрсетілген. Әлеуметтік желілерде оқиғаның бейнежазбасы да тарады.

Тергеу барысында иттердің иесі анықталған. Жәбірленушінің 60 жастағы көршісі өз ауласында 20-25 ит ұстаған. Ол Қарасай аудандық полиция басқармасына жеткізіліп, оған қатысты қылмыстық іс қозғалды. Сондай-ақ қоғамдық тәртіпті бұзғаны үшін заң аясында жауапкершілікке тартылған.

Алматы облысы Полиция департаментінің мәліметінше, жағдай бойынша қылмыстық іс тіркеліп, сотқа дейінгі тергеу басталды. Қазір оқиға орнында полиция қызметкерлері мен әкімдік өкілдері жұмыс істеп жатыр. Жануарларды аулаумен айналысатын мердігер ұйым ЖК Абдыкалов аталған мекенжайда қаңғыбас иттерді аулау жұмыстарын жүргізуде.