Балабақшаларға сары майды қымбатқа сатқандар анықталды. Бұл туралы Батыс Қазақстан облыстық Сауда және тұтынушылардың құқықтарын қорғау департаменті хабарлады.

Департамент басшысы Эльмира Қиматованың сөзінше, әкімшілік іс қозғалып, тиісті хаттама толтырылған:

— Мемлекеттік сатып алу порталында жасалған келісімшарт аясында кәсіпкер облыстың мемлекеттік мекемелеріне әлеуметтік маңызы бар азық-түлік жеткізген. Электрондық шот-фактураларды тексеру барысында 2025 жылғы қараша-желтоқсан айларында Оралдағы балабақшаларға 72,5 пайыздық майдың 180 грамдық қаптамасы жеткізілгені анықталды. Сатып алу бағасы 900 теңге болса, өткізу бағасы 2240 теңгеге жеткен. Заң бойынша шекті сауда үстемесі 15 пайыздан аспауы тиіс болса, нақты шекті көрсеткіш 148,8 пайызға жеткен, яғни екі еседен асып кеткен, — деді Э. Қиматова.

Департамент басшысының сөзінше, тапсырысты жеткізушілерді мемлекеттік мекемелер өздері таңдайды. Келісімшарт аясында бағаны төмендетуге мүмкіндік бар. Бірақ балабақшалар бұл мүмкіндікті қолданбай отыр. Өткен жылы 200 теңгелік қарақұмық 1 мың теңгеге дейін қымбаттаған жағдайлар тіркелген.

Сонымен бірге, әлеуметтік маңызы бар тауарларды көтерме бағамен жеткізетін барлық кәсіпкерлер норманы сақтай бермейді. Мысалы, бөлшек саудаға арналған «Илецк тұзы» 47 пайыз сауда үстемесімен сатылған.

— Электрондық шот-фактураларды талдау барысында тауардың сатып алу бағасы 68 теңге болса, өткізілген бағасы 100 теңге екені анықталды. Осыған байланысты жеткізуші ҚР Әкімшілік құқық бұзушылық туралы кодексінің 204-4-бабына сәйкес әкімшілік жауапкершілікке тартылды, — деді Э. Қиматова.