Бұрынғы әйелін желі арқылы аңдыған азаматқа сот үкімі шықты. Алматылық тұрғын қудалау әрекеттеріне қатысты Қылмыстық кодекстегі жаңа бап бойынша жауапқа тартылды. Аталмыш ереже азаматтарды психологиялық қысым мен жүйелі аңду әрекеттерінен қорғауға бағытталған.

Іс деректеріне сәйкес, ер азамат ажырасқанына қарамастан бұрынғы жұбайының мазасын алған. Ол әйелдің жүріс-тұрысын бақылап, жеке өміріне араласып, байланыс орнатуға тырысқан. Тіпті келіншектің жұмыс орнына барып, қорқытатын хаттар жолдаған.

Ал әйел үреймен өмір сүріп, бірнеше рет тұрғылықты мекенжайын да, жұмыс орнын да ауыстыруға мәжбүр болыпты. Бұрын әкімшілік жауапкершілікке тартылғанына қарамастан, ер адам өз әрекеттерін доғармаған.

Сот үкімімен айыпталушы кінәлі деп танылып, 100 сағат қоғамдық жұмысқа тартылды. Сондай-ақ жәбірленушіге өтемақы төлеуге міндеттелді.

Полиция қызметкерлері азаматтарды қудалау фактілеріне көз жұма қарамай, дер кезінде құқық қорғау органдарына жүгінуге шақырды.