FlyArystan рейсінің кешігуіне байланысты бір отбасы демалысына уақытында ұша алмай қалды. Алматы қаласы Түрксіб аудандық соты әуе компаниясына демалыстың толық құнын және моральдық өтемақы төлеуді міндеттеді.

Мәліметтерге сүйенсек, Юрий мен Ирина Трепелковтар тағы бір отбасы мүшесімен бірге Катарға тур сатып алған. Олар Шымкент қаласының тұрғындары болғанымен, ұшуы Алматыдан жоспарланған. Сол үшін Шымкент–Алматы бағытына FlyArystan билеттерін алған. Алайда әуе компаниясы рейсті 6 сағатқа кешіктірген. Соның салдарынан олар Дохаға ұшатын ұшақты өткізіп алды.

Отбасы алдымен компанияға өтемақы төлеуді талап еткен, бірақ менеджерлер билеттердің ақшасын ғана қайтаруға келіскен. Бұл талапқа келіспеген Трепелковтар сотқа жүгінді.

Сот FlyArystan жолаушыларға сапасыз қызмет көрсеткенін анықтап, әуе компаниясына 1,3 миллион теңгені өндіруді, әр адамға 200 мың теңгеден моральдық өтемақы төлеуді міндеттеді.