Отандық жасанды интеллект модельдеріне сұраныс төмен. Көпшілік шетелдік ChatGPT-ге жүгінеді. Осылай деген Мемлекет басшысы министр Жаслан Мәдиевті сынға алды.

Кеңейтілген Үкімет отырысында Қасым-Жомарт Тоқаев жасанды интеллект жүйелерінің дамуына байланысты мәселе көтерді. Мемлекет басшысы Kaz LLM бағдарламасына сұраныстың төмен екенін, халықтың шетелдік өнімдерді пайдаланатынын атап өтті. Өз кезегінде министр отандық өнімдердің ашық әрі қолжетімді екенін айтты.

«Қазіргі таңда бізде екі ірі тілдік модель бар – Kaz LLM және Alem LLM. Олар eGov AI және басқа да 40-тан астам жүйеге енгізілген. Бұл модельдер студенттерге, стартап-компанияларға және IT-компанияларға қолжетімді. Мұндай жүйелердің сапасын үздіксіз жетілдіріп отыру қажет, сондықтан халықаралық деңгейдегі сарапшылармен бірге біз бұл жұмысты жалғастырамыз», – деді Мәдиев.

Министрдің айтуынша KazLLM-модельіне 600 мыңнан астам сұраныс түскен. Ал елімізде ChatGPT-ді қолданатындардың үлесі жалпы халықтың 10 пайызын құрайды. Мемлекет басшысы айтылған деректерге күмән келтіріп, нақтылауды тапсырды.

Президент жүйедегі бірқатар кемшіліктерге назар аударып, көрсеткіштердің нақтылығын тексеруді тапсырды. Сонымен қатар ЖИ саласында үнемі жаңашылдыққа ұмтылып, әлемдік алпауыт компаниялар сияқты отандық өнімдерді үздіксіз жетілдіріп отыруды тапсырды.