Мемлекет басшысы Қытай Халықтық саяси консультативтік кеңесі Бүкілқытайлық комитетінің Тұрақты комитет мүшесі, Sunwah Group корпорациясының төрағасы, Гонконгтағы Қытай бас сауда палатасының төрағасы Цай Гуаньшэньмен жүздесті. Бұл туралы президенттің баспасөз қызметі хабарлады.

Кездесу барысында Қасым-Жомарт Тоқаев Қазақстан мен Қытай Халық Республикасы арасындағы жан-жақты стратегиялық серіктестікті белсенді түрде дамытудың айрықша маңызды екенін атап өтті. Сондай-ақ президент 2013 жылы ҚХР Төрағасы Си Цзиньпин алғаш рет Астанада ұсынған «Бір белдеу, бір жол» бастамасы табысты іске асырылып жатқанына назар аударды.

Ал, өз кезегінде Цай Гуаньшэнь қонақжайлық танытқаны үшін мемлекет басшысына алғыс айтты. Сондай-ақ ол Қазақстанның қаржы секторындағы инвесторлар үшін тартымды әрі сенімді инвестициялық юрисдикциясын жоғары бағалады. Корпорация басшысының айтуынша, бұған Президент Қасым-Жомарт Тоқаев пен Төраға Си Цзиньпин тарапынан көрсетілген жүйелі қолдау оң септігін тигізіп отыр.

Сонымен қатар, кездесу барысында қаржы, энергетика, цифрландыру, медицина, ауыл шаруашылығы және құрылыс салаларындағы ықпалдастықтың перспективті бағыттары қарастырылды.