Қазақстандық танымал әзілкеш Нұрлан Сабуровқа Ресейге кіруге 50 жылға тыйым салынды, деп хабарлайды "Dalamedia" ақпараттық порталы РИА Новости сайтына сілтеп.

Құзырлы органдардың мәліметінше, бұл шешім елдің ұлттық қауіпсіздігін қамтамасыз ету мақсатында қабылданған. Комик Ресейде тапқан табысын делдалдар арқылы заңдастыруға тырысқан. Сондай-ақ, ол ресейлік азаматтықты рәсімдеуден бас тартып, санкцияларға ұшыраудан қорыққан.

2024 жылы Сабуров тек Ресейде 50 миллион рубльден астам табысын декларациялаған. Қазіргі уақытта оның елде құны 60 миллион рубльден асатын мүлкі бар екені анықталған.

Әзілкеш Дубайдан ұшып келгеннен кейін Мәскеудегі Внуково әуежайында тыйым салынғаны жөнінде құжат алған. Сол сәтте ол біреуге хабарласуға тырысқан, бірақ оны арнайы бөлмеге шығарып, байланыс жасау мүмкіндігі шектелген. Life басылымының мәліметінше, Сабуров билет сатып алуға қаражат таппағандықтан, оны Дубайдан әуе маршалдары шығарып әкелген.