Павлодар облысының прокуратурасы қандастарды қоныстандыруға арналған мемлекеттік бағдарлама аясында бюджет қаражатын жымқыру дерегі бойынша мүлікті тәркілеуге қатысты сотқа дейінгі өндірісті бастады, – деп хабарлайды «Dalamedia» ақпараттық порталы azh.kz сайтына сілтеп.

Прокуратура өкілдерінің мәліметінше, тергеу барысында Ауғанстан азаматы өзінің қазақ ұлтына қатысы барын дәлелдеу үшін жалған деректер мен қолдан жасалған құжаттар ұсынғаны анықталған. Соның негізінде ол заңсыз түрде әлеуметтік төлемдер алған.

Алынған қаражатқа құны 20 миллион теңге болатын пәтер сатып алынғаны белгілі болды. Құқық қорғау органдары қылмыстық жолмен келген табысты заңдастыруға жол бермеу мақсатында сотқа өтінішхат жолдаған.

Сот бұл мүлікті мемлекет пайдасына тәркілеу туралы шешім қабылдаған. Алайда аталған сот актісі әзірге заңды күшіне енген жоқ.

Қазіргі таңда алаяқтық фактісі бойынша сотқа дейінгі тергеу жалғасып жатыр. Іс қылмыстық қудалау органдарының өндірісінде.