Алматыда әйгілі әнші Димаш Құдайбергеннің жеке заттарынан құралған көрме ашылмақ. Онда өнер иесінің сахналық костюмдері мен сирек музыкалық аспаптары көпшілік назарына ұсынылады, - деп хабарлайды Dalamedia ақпараттық порталы Zakon.kz сайтына сілтеме жасап.

2026 жылғы 18 ақпанда сағат 15:00-де Ықылас атындағы халық музыкалық аспаптары музейінде «Димаш: бір дауыс – мың ел» атты көрменің салтанатты ашылуы өтеді. Шараға Димаш Құдайбергеннің өзі қатысып, келушілерге балалық шағынан бері қолданып келе жатқан жеке домбырасын таныстырады.

Музей қызметкерлерінің айтуынша, көрменің негізгі мақсаты – өнер арқылы ел мен елді жақындатып жүрген дарынды тұлғаның шығармашылығын насихаттау, мәдени байланыстарды нығайту және жанкүйерлерге әншінің өмір жолы мен өнер әлемін тереңірек таныту. Экспозиция Димаштың халықаралық деңгейдегі жетістіктерін көрсетумен қатар, ұлттық музыкалық аспаптардың құндылығын кеңінен дәріптеуге бағытталған.

Көрмеге әншінің жеке қорынан 70-тен астам бірегей жәдігер қойылады. Олардың арасында 2011–2012 жылдары халықаралық ғарыш экспедициясымен бірге ғарышта болған якут халқының дәстүрлі чөмчөө уус аспабы, Майкл Джексонның стилисті Гоко Залди арнайы әзірлеген сахналық костюм, румын виртуозы Георге Замфир сыйға тартқан пан-флейта, сондай-ақ атасынан қалған баян секілді құнды дүниелер бар.

Сонымен қатар, ашылу рәсімі кезінде Димаш Құдайберген бала кезінен ойнап жүрген жеке домбырасын Ықылас атындағы халық музыкалық аспаптары музейінің қорына табыстайды.