Астанада 5 ақпанда нөсер жаңбыр жауып, ал 6 ақпан таңында қала қалың қарға оранды. Түнгі жаңбырдан кейін көшелер көк тайғаққа айналып, таңертең жауған қар мұздың бетін жауып қалды, – деп хабарлайды «Dalamedia» ақпараттық порталы Қазгидрометке сілтеп.

Қазір елордада ауа температурасы шамамен –4 градус. Жаңа түскен қар алғашқыда қаланы аппақ күйге бөлегенімен, жолдар мен тротуарларда ол тез арада лайсаң қарға айналып жатыр. Жел күшейіп, бетке соққан қар жүргіншілерге қозғалысты қиындата түсті.

Астана қалалық әкімдігі мамдарының айтуыша, 6 ақпанның таңынан бастап қар тазалауға 3 128 жол жұмысшысы мен 1 768 арнайы техника жұмылдырылған. Коммуналдық қызметтер қарды күреумен қатар, тротуарларға тұз сеуіп жатыр. Себебі күндізгі жылы ауа мен еріген қар кешке қарай қайтадан мұзға айналуы мүмкін.

Синоптиктердің болжамына сәйкес, жұма күні Астанада қар түріндегі жауын-шашын тоқтамайды. Көктайғақ пен төменгі боран күтіледі. Желдің жылдамдығы секундына 9–14 метрге дейін жетіп, екпіні 15–20 метрге дейін күшеюі мүмкін. Ауа температурасы түнде де, күндіз де –1…–3 градус шамасында болады.

7 ақпанда да қар мен боран сақталады. Бірақ бұл күні ауа температурасы күрт төмендеп, түнде –17…–19 градусқа, күндіз –14…–16 градусқа дейін суытады.

Осыған байланысты Астана әкімдігі тұрғындар мен қала қонақтарын жолда сақ болуға, мүмкіндігінше алыс сапарлардан бас тартуға шақырды. Төтенше жағдайларда 112 нөміріне хабарласу қажет.

Айта кетейік, ауа райының күрт нашарлауына байланысты 6 ақпанда елордадағы мектептердің бірінші және екінші ауысымындағы оқушылар қашықтан оқуға көшірілді. Сондай-ақ қар мен желге байланысты қалада алты автобус бағыты уақытша тоқтатылған.