Таразда кәмелетке толмаған жасөспірімді азғырды деген күдікпен жергілікті тұрғын қолға түсті. Желідегі «жасөспірім қызбен» кездесуге келген ер адамды қоғам белсенділері құрықтаған.

Оқиғаның мән-жайына сүйенсек, еріктілер 12 жасар қыздың атынан жалған аккаунт ашып, күдіктінің әрекетін бақылауға алған. Азғын ойын іске асырмақ болған ер адам «бойжеткенге» порнографиялық мазмұндағы видеолар жолдап, оны қайталауды талап еткен. Сонымен қатар, материалдық сыйақы мен дүкеннен қалағанын алып беруді уәде етіп, бетпе-бет кездесуге шақырған. Алайда, белгіленген орында оны «жасөспірім» емес, белсенділер тобы қарсы алды. Ұстау сәтінде күдікті өзін «қызметкермін» деп таныстырып, жауапкершіліктен қашпақ болған.

Тараз қалалық Полиция департаменті аталған деректі растап, қазіргі уақытта сотқа дейінгі тергеу амалдары басталғанын хабарлады. Ведомствоның баспасөз қызметінің мәліметінше, қылмыстық істің толық мән-жайын анықтауға бағытталған барлық қажетті тергеп-тексеру іс-шаралары жүргізілуде.