Құмар ойын бизнесін заңсыз ұйымдастырды деген күдікпен екі шетелдік азаматқа халықаралық іздеу жарияланды.

Құқық қорғау органдарының мәліметінше, күдіктілер — 1970 жылы 27 маусымда туған АҚШ азаматы Дмитрий Дружинский және 1985 жылы 8 қарашада туған Украина азаматы Марина Левкович (Гинзбург).

Сот оларды сырттай қамауға алу туралы санкция берген.

Тергеу нұсқасына сәйкес, аталған тұлғалар шетелдік компаниялар арқылы жұмыс істеген “PIN-UP” және “PINC” брендтерімен онлайн казино желісінің қызметін ұйымдастырған. Олар қызметкерлерді іріктеу мен басқаруды үйлестіріп, банктермен және төлем жүйелерімен өзара іс-қимылды жолға қойған, сондай-ақ қаржыны қабылдау және шығару тетіктерін құрған деп айыпталуда.

Өз қызметін жасыру мақсатында күдіктілер букмекерлік қызметке лицензиясы бар “Bonami” компаниясын тіркеп, казино пайдаланушыларының қаржылық операцияларын өңдейтін бірнеше төлем ұйымдарын құрғаны анықталды.