Қаржылық мониторинг агенттігі (ҚМА) азамат Қамза Қайсар Бақытжанұлын халықаралық іздеуге жариялады. Ол 1995 жылғы 18 қыркүйекте туған, Қазақстан Республикасының азаматы.

Сот санкциясымен күдіктіге қатысты «қамауда ұстау» түріндегі бұлтартпау шарасы тағайындалған. ҚМ агенттігінің хабарлауынша, Қамза Қ.Б. заңсыз құмар ойын бизнесіне жәрдемдесті деп күдіктелуде.

Тергеу деректері бойынша, ол соңғы бес жыл бойы әлеуметтік желілерде белсенді әрекет етіп, Instagram аккаунты (qais_arr, 2,4 млн жазылушы) және Telegram-дағы жабық арнасы («Қора энтертейнмэнт», 368 мың жазылушы) арқылы Қазақстан азаматтарын «Pinco» онлайн-казиносына тіркелуге шақырған. Сонымен қатар, әр бейнематериалдың астына жеке промокодын орналастырып, қолданушыларға бонус беріп отырған.

ҚМА мәліметінше, күдікті онлайн-платформаны жарнамалау арқылы табыс алған – сыйақы, бонус немесе пайыздық аударымдар түрінде. Заңсыз кірістерді жасыру үшін ол криптовалюта әмиянын пайдаланған. Сот санкциясымен 182 736,741 USDT көлеміндегі активтерге тыйым салынды.