Қаржы мониторингі агенттігі (ҚМА) елімізде үш азаматқа іздеу жарияланғанын хабарлады. Олар Бірыңғай жинақтаушы зейнетақы қорынан (БЖЗҚ) 46 млрд теңгеден астам қаржыны заңсыз иемденді деген күдікке ілінген.

Ведомствоның мәліметінше, іздеуде жүргендер:

• Аслан Дүйсенов (01.04.1992 ж.т.),

• Габбас Иманаев (18.05.1998 ж.т.),

• Есімхан Елешев (11.09.1987 ж.т.).

Тергеу нұсқасына сәйкес, аталған азаматтар Ақтау мен Атырау қалаларындағы жалған стоматологиялық емханалардың атынан медициналық құжаттарды рәсімдеген. Алайда бұл мекемелер іс жүзінде жұмыс істемеген және халыққа ешқандай қызмет көрсетпеген.

ҚМА хабарлауынша, күдіктілерге бұлтартпау шарасы ретінде қамауға алу түрі белгіленген.

Белгілі болғандай, Аслан Дүйсенов бұрын полиция қызметкері болған. Ол жұмыстан шығарылып, 2016 жылы ауыр қылмыстар үшін, соның ішінде қызметтік өкілеттігін асыра пайдаланғаны үшін 5 жыл темір торда қамалған.

Агенттік азаматтардан күдіктілердің қайда жүргені туралы қандай да бір мәлімет болса, төмендегі телефонға хабарласуды сұрайды: +7 (7172) 70-84-78. Анонимдік пен сыйақы берілетіні кепілдендіріледі.

Айта кетейік, бұған дейін ҚМА 30-дан астам жалған стоматологиялық емхананы әшкерелеген болатын. Тергеу деректері бойынша, осындай қылмыстық топтар зейнетақы қорынан 200 млрд теңгеден астам қаражатты заңсыз шығарған. Бұл қаржыға элиталық көліктер, қымбат жылжымайтын мүлік пен зергерлік бұйымдар сатып алынған.