Қаржы мониторингі агенттігінің (ҚМА) Ақмола облысы бойынша департаменті прокуратураның үйлестіруімен Көкшетау қаласында әрекет еткен «S-Group» қаржы пирамидасының құрылымдық бөлімшесінің басшыларына қатысты тергеуді аяқтады.

Тергеу мәліметінше, ұйымдастырушылар азаматтарға «S-Pharmaceutical» және өзге де жобаларға инвестиция салу арқылы медициналық каннабис өндірісі мен дистрибуциясына қатысу мүмкіндігін ұсынған. Олар әрбір жаңа қатысушы үшін салым сомасының 5 пайызы көлемінде кепілді табыс уәде еткен.

Қатысушылар сайт арқылы тіркеліп, кем дегенде 100 АҚШ долларынан бастап қаржы салуға міндеттелген.

Белгілі болғандай, күдіктілердің бірі бұған дейін «Life Is Good» және «Finiko» қаржы пирамидаларының қызметіне қатысып, сол арқылы табыс тапқан. Кейін осындай схема негізінде өз жобасын құрған.

Нәтижесінде пирамидаға 59 азамат тартылып, жалпы сомасы 136 миллион теңгеден астам қаражат жиналған.

Күдіктілер салымшылардың ақшасына елордадан екі пәтер мен автотұрақ орнын сатып алған, сот шешімімен аталған мүлікке тыйым салынды.

Үш ұйымдастырушыға қатысты қозғалысын шектеу және тәртіп сақтау туралы қолхат түріндегі бұлтартпау шарасы қолданылды.

Қылмыстық-процестік кодекстің 201-бабына сәйкес, тергеудің өзге мәліметтері жариялауға жатпайды.