Батыс Қазақстан облысы, Ақсай қаласында жер үй өртеніп, салдарынан үш адам көз жұмды.

Төтенше жағдайлар департаментінің мәліметінше, өрт туралы хабар түскен бойда оқиға орнына өрт сөндіру қызметі жедел жеткен. Алайда құтқарушылар барған сәтте тұрғын үйді толықтай жалын шарпығаны анықталған.

Ресми дерекке сәйкес, аталған баспанада қазіргі уақытта бір адамның тұрғаны белгілі болған. Қаза тапқан адамдардың жеке басы мен өрттің нақты шығу себебі анықталып жатыр.

«Өрт шамамен 90 шаршы метр аумақты қамтыды. Қазіргі таңда өрттің шығу себептері анықталу үстінде. Оқиға орнына департаменттің жеке құрамынан 14 қызметкер және 3 техника жұмылдырылды», – деді БҚО ТЖД басқарма бастығы Дамир Салихов.

Қайғылы оқиғаға байланысты тиісті тексеру жұмыстары жүргізіліп жатыр.