Ресми деректерге сәйкес, өрт сөндірілгенімен, кей аймақтарда әлі де бықсып жатқан ошақтар бар. Оқиға орнынан 44 адамның сүйегі шығарылды. 300-ден астам тұрғын әлі табылған жоқ. Ауыр жарақат алған 45 адам ауруханаларға жеткізілді. Қауіпсіз жерге шығарылған 700-ден астам адам уақытша орталықтарға орналастырылған.

15 сағаттан астам уақытқа созылған өрт сөндіру жұмыстары кезінде мамандар кешеннің сыртқы қабырғалары қорғаныш торларымен, мембраналармен, су өткізбейтін брезент пен пластик парақтарымен қапталғанын анықтады. Полиция қызметкері Эйлин Чжанның айтуынша, бұл материалдар өрт қауіпсіздігі талаптарына мүлде сай келмеген. Тергеу барысында лифт холдарындағы терезелердің көбік материалмен бітеуленгені белгілі болды — бұл адамдардың дер кезінде эвакуациялануына кедергі келтірген негізгі факторлардың бірі.

Қазіргі таңда адам өліміне себеп болды деген күдікпен үш адам қамауға алынды: құрылыс фирмасының екі директоры және инженер-кеңесші. Ал өрттің нақты неден тұтанғаны әзірге анықталып жатыр.

Полиция мәліметінше, кешен ішіндегі полистирол тақташалар мен бұғатталған терезелер өрттің лезде таралуына ықпал еткен. Ал жалынның көрші блоктарға өтуіне аулада орналасқан бамбук конструкциялары әсер етуі мүмкін деген болжам бар.

Гонконг билігі қаза болғандардың саны әлі де өсуі мүмкін екенін жасырмай отыр. Қала тұрғындары үшін бұл өрт — соңғы жылдардағы ең ауыр және ең дабылды оқиғалардың бірі.