Астанада автонесиеге байланысты алаяқтық схеманы ұйымдастырған қылмыстық топ мүшелеріне сот үкімі шықты. Тергеу барысында олардың қаржылық қиын жағдайда жүрген азаматтарды жүйелі түрде алдап келгені анықталды.

Сот материалдарына сәйкес, айыпталушылар тұтынушылық несиеден «құтқарып береміз» деген сылтаумен қызмет ұсынған. Алайда іс жүзінде жәбірленушілердің атына автонесие және өзге де кредиттер рәсімдеп, қарыз жүктемесін одан әрі көбейткен. Ай сайынғы төлемдерді өздері төлейміз деп уәде бергенімен, бұл міндеттемелер орындалмаған.

Қылмыстық топтың негізгі құрбандары әлеуметтік жағынан қорғансыз азаматтар болған. Табысы төмен және мүмкіндігі шектеулі жандар қарыздан құтылу үмітімен алаяқтардың шарттарына келіскен. Нәтижесінде жүздеген адам ірі көлемдегі қарызға батып, қаржылық жауапкершілікті өз мойнына алған.

Құқық қорғау органдарының дерегінше, келтірілген материалдық шығын 240 миллион теңгеден асқан.

Сот үкімімен қылмыстық топты ұйымдастырған тұлға 9 жылға бас бостандығынан айырылды. Оның сыбайластарына 6 жылдан 8 жылға дейінгі мерзімге жаза тағайындалды.

Айта кетейік, үкім әзірге заңды күшіне енген жоқ.