Алдағы уақытта еліміздегі дүкендер мен қызмет көрсету орындарында кез келген банктің картасымен төлем жасауға мүмкіндік беретін біртұтас QR-терминалдар пайда болады. Жаңа талапқа сәйкес, қазақстандық банктер жеке кәсіпкерлер мен заңды тұлғаларды бірыңғай QR-код арқылы төлем қабылдайтын жабдықпен қамтамасыз етуге міндеттеледі.

Аталған жүйені банктер 2026 жылдың екінші жартысынан бастап ұсынуы тиіс. Біртұтас банкаралық QR-код арқылы сатып алушы қай банктің картасын қолданса да, төлемді еркін жүргізе алады.

Қазір QR арқылы есеп айырысу үшін көбіне белгілі бір банкке тиесілі терминал қажет. Жаңа ереже бұл шектеуді жояды. Терминалдың қай банкке тиесілі екеніне қарамастан, кез келген қаржы ұйымының картасымен төлем жасау мүмкін болады. Бұл бизнес үшін есеп айырысуды жеңілдетіп, банктерге тәуелділікті азайтса, тұтынушылар үшін қолма-қолсыз төлемді анағұрлым ыңғайлы етеді.

Банктердің кәсіпкерлерді банкаралық мобильді төлем жүйесіне қосу міндеті Президент 16 қаңтарда қол қойған заңда бекітілген. Құжат қаржы нарығын реттеу және дамытуға қатысты бірқатар өзгерістерді қамтиды.

Сондай-ақ, жеке кәсіпкерлер мен заңды тұлғаларға POS-терминал орнататын банктер біртұтас QR-код арқылы төлем қабылдау мүмкіндігін қамтамасыз етуі қажет. Бұл алдағы уақытта кәсіпкерлерге әртүрлі банктердің бірнеше терминалын қолданбай, бір ғана құрылғымен жұмыс істеуге жол ашады.