Түркістан облысында 2025 жылы кәсіпкерлердің құқықтарын қорғау бағытында атқарылған жұмыстар нәтижесінде бизнеске 1,1 млрд теңгеден астам қаражат қайтарылды. Бұл туралы облыстық кәсіпкерлер палатасы хабарлады. 

Ведомство мәліметінше, жыл басынан бері палатаға кәсіпкерлерден 170 өтініш түскен. Оның 66-сы eOtinish жүйесі арқылы жолданған. Нәтижесінде өтініштердің 81-і, яғни 48 пайызы кәсіпкерлердің пайдасына шешілген. Сондай-ақ мемлекеттік органдарға 580 ресми сұраным жолданып, палата өкілдерінің қатысуымен 34 сот ісі қаралған.

2025 жылдың алғашқы жартыжылдығында мемлекеттік сатып алу саласында да нақты нәтижелер тіркелді. Мемлекеттік сатып алудың жоспарсыз қатысушылары тізілімінен шығару үшін құрылған келісім комиссиясының құрамына кәсіпкерлер палатасының өкілдері енгізілді. Соның нәтижесінде бес кәсіпкерлік субъектісі - «Бекарысстрой», «DanAia», «KAZ ELIT STROY», «Forum Stroy» және «Farab street» жауапкершілігі шектеулі серіктестіктері аталған тізімнен шығарылды.

Сонымен қатар Түркістан қалалық мәдениет үйіне қатысты мемлекеттік сатып алу барысында даулы жағдай туындаған. Жалпы сомасы 177 млн теңгеден астам келісімшарттар жасалғанымен, тапсырыс беруші төлем міндеттемелерін орындамаған. Мәселе кеңес отырысында қаралып, жауапты лауазымды тұлға тәртіптік жауапкершілікке тартылды. Нәтижесінде кәсіпкерлер алдындағы берешек толық өтеліп, олардың мүліктік құқықтары қалпына келтірілді.

Бұдан бөлек, кәсіпкерлік субъектілерінен түскен 34 өтініш бойынша палата қызметкерлері сот процестеріне өкіл ретінде қатысқан. Қаралған 15 іс нәтижесінде кәсіпкерлердің 432 млн теңгеден астам қаржылық мүддесі қорғалды.

Кәсіпкерлер палатасының мәлімдеуінше, 2025 жылы жалпы сомасы 1,1 млрд теңгеден асатын кәсіпкерлердің мүліктік құқықтары қорғалған. Оның ішінде 711 млн теңгеден астам қаржы көлемінде залал өтеліп, негізсіз шығындардың алдын алу қамтамасыз етілген. Ал 432 млн теңгеден аса қаражат сот арқылы, 177 млн теңгеден астам берешек мемлекеттік орган тарапынан өтелген.