Оның айтуынша, 2019–2024 жылдары мемлекет бизнеске 4,5 трлн теңге бөлген. Қаражаттың 90%-ы небәрі бес құралға тиесілі: шығындарды және кредит пайызын субсидиялау, тауарлардың кепілдік берілген көлемін сатып алу, кредит беру және лизинг.

Аудит Мемлекет басшысының мемлекеттік қолдау шараларын түгендеу тапсырмасы толық орындалмағанын көрсетті. Ұлттық экономика министрлігі жасаған бірыңғай тізілімнің сапасы төмен, онда кейбір қолдау түрлері қамтылмаған әрі өзектілігін жоғалтқан шаралар бар.

Сондай-ақ қолдау шараларының әлеуметтік және экономикалық әсерін бағалау әдістемесі нақты емес. Әртүрлі мемлекеттік органдар әрқилы тәсіл қолданады.

Аудит барысында бір бизнес субъектісінің 10 жыл бойы бюджеттен тұрақты қаржыландырылып, 19 түрлі қолдау шарасын алғаны анықталған. Смайыловтың айтуынша, мемлекеттік қолдау шаралары нақты нәтижеге қарай қайта бағаланбай, инерциямен жалғасып келеді.