Германияда қаза тапқан қазақстандық судья Айгүл Сайлыбаеваның анасы Шолпан Батқалова Қазақстан Президенті Қасым-Жомарт Тоқаевқа үндеу жасап, күдіктілерді елге экстрадициялау ісіне араласуын сұрады.
Марқұмның анасының айтуынша, қызының өліміне қатысы бар деп күдікке ілінген адамдар әлі күнге дейін жауапкершіліктен жалтарып жүр.
Шолпан Батқалованың мәліметінше, Айгүл Сайлыбаева 2024 жылдың 4 маусымында қаза тапқан. Марқұмның денесі 30-дан астам пышақ жарақатымен тек 13 күннен кейін көлден табылған. Германия полициясының дерегіне сәйкес, дене көлге табылардан екі сағат бұрын ғана жеткізілген. Тергеу барысында негізгі күдікті ретінде марқұмның енесі Наталья Донцова аталып отыр. Айгүл жоғалып кеткеннен кейін ол Германия аумағынан асығыс кеткен.
Сонымен қатар, Айгүлдің күйеуі Александр Донцов әйелінің жоғалғаны жөнінде полицияға хабарламаған. Тергеу нұсқасына сәйкес, марқұмның денесін көлге апаруы мүмкін тұлға ретінде дәл осы азамат қарастырылып отыр. Ал олардың туысы Владимир Василенко қылмысқа сыбайлас болуы мүмкін деген күдік бар.
Марқұмның анасының айтуынша, Қазақстанда аталған дерек бойынша қылмыстық іс қозғалған. Алайда күдіктілердің Ресей аумағында болуы тергеу амалдарын толық жүргізуге кедергі келтіріп отыр. Жуырда Донцовтардың Мәскеуде жүргені анықталған.
— Қазіргі таңда кәмелетке толмаған немерем Жаклин анасының өліміне қатысы бар адамдармен бірге тұрып жатыр деп қауіптенемін. Мемлекет басшысынан Ресей тарапымен дипломатиялық келіссөздер жүргізіп, күдіктілерді Қазақстанға экстрадициялауға ықпал етуін сұраймын, — деді Шолпан Батқалова.
DALAMEDIA admin
12
0