Түркістан облысы Жетісай аудандық соты Шардара ауданы Қоссейіт ауылында өз әкесіне күш қолданған Алмас Садақбаевқа қатысты үкім шығарды.

Сот 41 жастағы Алмас Садақбаевты Қылмыстық кодекстің «Қинау» және «Денсаулыққа қасақана орташа ауырлықтағы зиян келтіру» баптары бойынша кінәлі деп танып, 5 жылға бас бостандығынан айырды.

Сот шешімі

Садақбаев жазасын қауіпсіздігі орташа түзеу мекемесінде өтейді.

Сот оның бұрын қамауда болған 1 күнін 1,5 күнге есептеу туралы шешім қабылдады.

Үкім шығару кезінде сот:

• сотталушының кәмелетке толмаған балалары барын,

• отбасының жалғыз асыраушысы екенін,

• бұрын сотты болмағанын ескерген.

Апелляция мәселесі

Сотталушының туған інісі, жәбірленушінің өкілі ретінде танылған Батыр Садақбаевтың үкімге апелляциялық шағым түсіретіні немесе түсірмейтіні әзірге белгісіз.

Соттағы соңғы сөз

Жарыссөз барысында Алмас Садақбаев көз жасына ерік беріп, жұрттан кешірім сұраған. Ол өз әрекетін ойланбай жасағанын, болған жағдайға шынайы өкінетінін және өзін бұл үшін ешқашан кешірмейтінін айтқан.

Қылмыстық істің мән-жайы

Тергеу мәліметінше, сотталушы 70 жастағы зейнеткер, мүгедек әкесіне өздігінен дәретке шыға алмайтынына ашуланып, күш қолданған.

Оқиға сәті көрші үйдің қыздары тарапынан жасырын видеоға түсіріліп, әлеуметтік желіде тараған. Бейнежазба қоғамда үлкен резонанс тудырған.

Көп ұзамай аталған дерек бойынша қылмыстық іс қозғалып, Алмас Садақбаев қамауға алынған.